Hukumar Sufurin Wutar Lantarki ta Najeriya (TCN) ta sanar da cewa za a gudanar da aikin gyaran cibiyar rarraba wutar lantarki a ranar Lahadi, 28 ga Yunin 2026, wanda zai haifar da katsewar wutar lantarki na wucin gadi a Kano da wasu jihohin Arewa.
A cikin wata sanarwa da Daraktan Yaɗa Labarai na hukumar, Ndidi Mbah, ya fitar, TCN ta bayyana cewa aikin gyaran na da nufin inganta tsarin isar da wutar lantarki da tabbatar da ingantaccen sabis ga masu amfani.
Hukumar ta ce katsewar wutar za ta shafi yankunan da ke ƙarƙashin Kamfanin Rarraba Wutar Lantarki na Kano (KEDCO), da kuma wasu sassan Kamfanin Rarraba Wutar Lantarki na Jos (JEDC) da Kamfanin Rarraba Wutar Lantarki na Yola (YEDC).
Jihohin da za su fuskanci katsewar sun haɗa da Kano, Katsina, Jigawa, da kuma garin Azare a Jihar Bauchi. Haka kuma, garin Nguru na Jihar Yobe da Gazaoua a Jamhuriyar Nijar za su kasance cikin yankunan da aikin zai shafa.
TCN ta buƙaci al'ummar yankunan da abin ya shafa da su yi haƙuri da wannan katsewar ta wucin gadi, tana mai tabbatar da cewa za a dawo da wutar lantarki da zarar an kammala aikin gyaran.
Hukumar ta jaddada cewa irin waɗannan ayyukan gyara na da muhimmanci domin ƙarfafa tsarin rarraba wutar lantarki, rage matsalolin katsewar wuta a nan gaba da kuma inganta samar da lantarki ga masu amfani.
