Ƙungiyar Kiristoci ta Najeriya (CAN) a jihohi 19 na Arewacin Najeriya da Babban Birnin Tarayya Abuja, tare da haɗin gwiwar Ƙungiyar Ecumenical Synods of Bishops, Archbishops, Apostles and Senior Clergy, sun yi watsi da ikirarin Shugaban Amurka, Donald Trump, cewa sojojin Amurka sun kawo ƙarshen kashe-kashen Kiristoci a Najeriya.
Limaman Kiristocin sun bayyana kalaman Trump a matsayin ƙarya da ba ta yi daidai da abin da ke faruwa a Najeriya ba. Sun ce har yanzu matsalar rashin tsaro na ci gaba da addabar al'ummomi a sassa daban-daban na ƙasar, ba tare da la'akari da addini ba.
Trump ya yi wannan ikirari ne yayin wani taro da aka gudanar a Washington, inda ya ce tsoma bakin da Amurka ta yi ya taka muhimmiyar rawa wajen dakatar da hare-haren da ake kai wa al'ummomin Kirista, musamman a yankunan da ke fama da ta'addanci.
A cewarsa, kafin matakin da Amurka ta ɗauka, dubban mutane da suka haɗa da mata, yara da tsofaffi sun rasa rayukansu a hare-haren da ake kai wa Kiristoci a Najeriya.
Trump ya kuma yi ikirarin cewa hare-haren da Amurka ta kai sun raunana waɗanda ke da alhakin kai hare-haren, yana mai cewa an kashe shugaban ƙungiyar da mataimakansa, lamarin da ya sa sauran mayaƙan suka fara tsoron ci gaba da kai hare-hare.
Sai dai shugabannin CAN da limaman Kiristocin sun ce babu wata shaida da ke nuna cewa sojojin Amurka sun gudanar da irin wannan farmaki a Najeriya ko kuma cewa matsalar kashe-kashe ta ƙare.
Sun yi gargadin cewa irin waɗannan kalamai na iya karkatar da hankalin duniya daga ainihin matsalar rashin tsaro da Najeriya ke fuskanta, tare da rage muhimmancin ƙoƙarin da ake buƙata domin magance ta.
Limaman sun yi kira ga gwamnatin Najeriya da ƙasashen duniya da su ci gaba da tallafawa matakan da za su kawo ƙarshen hare-haren da ke shafar al'ummomi ba tare da bambancin addini ko ƙabila ba, tare da tabbatar da adalci da tsaro ga kowa.
