Rundunar 'yan sandan jihar Borno ta tabbatar da cewa wasu mayaƙan da ake zargin na ƙungiyar ISWAP ne sun kai hari makarantar Sakandiren Gwamnati da ke garin Lassa, ƙaramar hukumar Askira/Uba, inda suka yi garkuwa da ɗalibai da malamai a lokacin da ake gudanar da jarabawar kammala sakandare ta NECO.
Mai magana da yawun rundunar 'yan sandan jihar, Nahum Kenneth Daso, ya tabbatar da aukuwar harin, yana mai cewa maharan sun kutsa yankin ne bayan sun bayyana a kasuwar Lassa a kan babura kwana guda kafin kai harin makarantar.
A cewarsa, maharan sun riƙa harbi ba tare da kakkautawa ba, lamarin da ya yi sanadin mutuwar wani malami. Daga nan suka shiga harabar makarantar, inda suka yi awon gaba da ɗalibai da malamansu yayin da ake ci gaba da rubuta jarabawa.
Majiyoyi daga yankin sun ce harin ya faru ne da misalin ƙarfe tara na safe, lokacin da ɗalibai ke cikin azuzuwa suna rubuta jarabawar NECO. Maharan sun shiga ɗakunan jarabawa tare da tilasta wa ɗalibai da malamai bin su zuwa cikin daji.
Rundunar 'yan sanda ta ce jami'an tsaro sun yi gaggawar tunkarar maharan, abin da ya taimaka wajen rage girman barnar da suka shirya yi. Sai dai har yanzu ba a bayyana adadin mutanen da aka sace ba.
Hukumomin tsaro sun ce an baza jami'ai a dazukan da ke kewaye da yankin domin bin sawun maharan da kuma ceto waɗanda aka yi garkuwa da su cikin ƙoshin lafiya.
Wannan hari ya sake tayar da hankalin al'umma, domin ya zo ne kwanaki 47 kacal bayan wasu ɗalibai 42 suka faɗa hannun masu garkuwa da mutane daga makarantar Mussa da ke wannan ƙaramar hukuma, waɗanda har yanzu ba a ceto su ba.
Masu ruwa da tsaki a fannin ilimi sun yi Allah wadai da ci gaba da kai hare-hare kan makarantu, suna mai cewa hakan na barazana ga ilimin yara da makomar matasan Arewa maso Gabashin Najeriya. Sun buƙaci gwamnati ta ƙara tsaurara matakan tsaro a makarantu da wuraren rubuta jarabawa domin kare rayuka da tabbatar da ci gaba da harkokin ilimi.
